.
Нэг л өдөр
Төрсөн гэрээсээ явсан.
Ирээдүйгээс илгээсэн аниргүй цуурайнд
Зүрх битүүхэн түгшиж
Их л холын сайханд
Тэсэлгүй яарсан.
Гэвч
Нэг л биш өдрүүд
Уйтгартайяа цуван ирээд
Дурсагдах мөргүй одож
Нэг л биш жилүүдэд би
Нэг л биш амьдрахдаа
Зүрхээ улам хоосрохыг мэдэрч
Зүүд, амьдралаа ялгахаа болилоо.
Гэвч
Энэ нэг л биш дундаас
Нэг л биш юм олсондоо
Ай
Нэг л их баярласан.
Хайрлаж чадаагүй өдрүүдээ
Малгайгаа авч үдчихээд
Нэг л өдөр
Нутагтаа очино.
Хэгжүүн зангаа хэцийнх нь салхинд гээж
Хөх хөтлийн оройд өвдөг сөгдөнө.
Гундашгүй үзэсгэлэнт уулстаа мөргөнө.
Эх-өрт, үл хүртээгч санагалзал дээр чинь
Эр халуун нулимсаа унагаж
Хүй амирлах нутгийнхаа бүлээн тэвэрт
Бүтэн болохын зөн сэрж
Хүннү дээдсээс онголон суусан
Гүн дардаст хөрсийг чинь үнсэнэ.
Нэг л өдөр.
.
2010/03/23
Subscribe to:
Post Comments (Atom)
No comments:
Post a Comment